مايا القصوري:”انتم تعيشوا حاجة أفظع من النظام السابق.. تونس ولات مصب متع زبلة ومازلتوا خايفين من رجوع الديكتاتورية وانتهاك الحريات؟”..

Sharing is caring!

كتبت المحامية والكرونيكاز مايا القصوري على صفحتها بأنستغرام ما يلي :
التوانسة الي خايفين من رجوع الدكتاتورية و من الفاشية و من انتهاك الحريات هاو جاتكم فرصة ذهبية بش تناضلوا و دافعوا على مبادئكم ان كنتم صادقين مش فقط تحبوا تنبروا على الفيسبوك :
تقرير محكمة المحاسبات ورى التلاعب بالانتخابات و وزير الداخلية قال الي امنيين سامين تورطوا في اغراق تونس بالمخدرات ووزير الدفاع قال الي ضباط من الجيش تورطوا في الإرهاب و التهريب و قضاة سامين شهدوا على بعضهم بالوثائق الي واحد منهم تلاعب بقضايا الإرهاب و تستر و خبى حماية لطرف سياسي و الي لاخر يأخذ في الرشوة…. هذا الكل مؤسسات الدولة اعترفت و بالأدلة مش احنا قلنا…
اي عاد ياخي دولة يتم فيها التلاعب بالانتخابات ما هاش دكتاتورية؟ دولة القضاء مخترق فيها بالطريقة هذي تحمي الحريات و الحقوق؟ دولة اخترقها الإرهاب في مؤسساتها السيادية ماهاش فاشية تخوف؟؟
انا شديت نهارين نستنى في ردود أفعالكم… قلت هذم الي في حالة على الديمقراطية لازم بش يزلزلوها الدنيا بعد هالاخبار الجهنمية.. عاد كيف ريتكم سكتوا حدكم تأوه صغير على الفايسبوك بين غناية و نكتة… قلت نفكركم بغرامكم بالديمو و خوفكم من رجوع الدكتاتورية وتراجع الحريات …
وقتلي انتوما اليوم تعيشوا حاجة أفظع من النظام السابق بالبروفة وتونس الخضراء ولات مصب متع زبلة… اي وينكم عاد؟؟ حتى اعتصام سلمي لا خلي نجي معاكم😁؟ والا الفم الحارك و القلب البارك و كيف العادة تستناو في يد القطوسة تهزلكم القسطل… و بالطبيعة تسبوا يد القطوسة كان ما جاتش مع جوكم بالضبط….